737
ឧត្តមស្នងការទទួលបន្ទុកសិទ្ធិមនុស្ស
លោកស្រី មីស្យែល បាស្យេឡេត ជឺរៀ (Michelle Bachelet Jeria)
នៅថ្ងៃទី១ ខែកញ្ញា ឆ្នាំ២០១៨ លោកស្រីមីស្យែល បាស្យេឡេត បានចូលកាន់តំណែងជាឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស។ ការិយាល័យឧត្ដមស្នងការទទួល បន្ទុកសិទ្ធិមនុស្ស ត្រូវបានបង្កើតឡើងនៅឆ្នាំ១៩៩៣ ហើយលោកស្រី បាស្យេឡេតគឺជាឧត្តស្នងការទីប្រាំពីរ។
លោកស្រី បាស្យេឡេត ត្រូវបានជ្រើសតាំងជាប្រធានាធិបតីនៃប្រទេសស៊ីលីចំនួនពីរលើក (២០០៦-២០១០ និង ២០១៤-២០១៨) ។ លោកស្រីគឺជាប្រធានាធិបតីស្ត្រីទីមួយនៃប្រទេសស៊ីលី លោកស្រីក៏ធ្លាប់បម្រើការងារជារដ្ឋមន្រ្តីក្រសួងការពារជាតិលើកដំបូងនៃប្រទេសស៊ីលី និងអាមេរិកឡាទីន (២០០០ - ២០០២)។ លោកស្រីក៏ធ្លាប់បម្រើការងារជារដ្ឋមន្រ្តីក្រសួងសុខាភិបាល ផងដែរ (២០០២ - ២០០៤)។
នៅក្នុងអំឡុងពេលដែលលោកស្រីកាន់តំណែងជាប្រធានាធិបតី លោកស្រីបានលើកស្ទួយសិទ្ធិទាំងអស់ ជាពិសេសគឺសិទ្ធិរបស់ជនដែលងាយរងគ្រោះបំផុត។ ក្នុងចំណោមសមិទ្ធផលជាច្រើនរបស់លោកស្រី មានកំណែទម្រង់វិស័យអប់រំ និងពន្ធដា ក៏ដូចជា ការបង្កើតវិទ្យាស្ថានជាតិសិទ្ធិមនុស្ស និងសារមន្ទីរនៃការចងចាំ និងសិទិ្ធមនុស្សលេចធ្លោ ដូចជាការបង្កើតក្រសួងកិច្ចការនារី និងសមភាពយែនឌ័រ ការអនុម័តកូតាដើម្បីបង្កើនការចូលរួមក្នុងជីវភាពនយោបាយរបស់ស្ត្រី និងការអនុម័តច្បាប់សហភាពជនស៊ីវិល (Civil Union Act) ដែលផ្តល់សិទ្ធិឲ្យគូស្វាមីភរិយាដែលស្រឡាញ់ភេទដូចគ្នា ដែលតាមរយៈនេះជួយលើកកម្ពស់សិទ្ធិអ្នកស្រលាញ់ភេទដូចគ្នា (LGBT)។
ចាប់តាំងពីដើមទសវត្សរ៍ ៩០ មក លោកស្រី បាស្យេឡេត បានបម្រើការងារយ៉ាងជិតស្និទ្ធជាមួយអង្គការអន្តរជាតិជាច្រើន។ ក្នុងឆ្នាំ ២០១០ លោកស្រីបានធ្វើជាប្រធានក្រុមប្រឹក្សាយោបល់វេទិកាការពារសង្គម ដែលជាគំនិតផ្តួចផ្តើមរួមគ្នាមួយរបស់អង្គការពលកម្មអន្តរជាតិ (ILO) និងអង្គការសុខភាពពិភពលោក (WHO) ដែលមានគោលដៅលើកកម្ពស់គោលនយោបាយសង្គមដើម្បីពន្លឿនកំណើនសេដ្ឋកិច្ច និងសិនិទ្ធភាពសង្គម។
ក្នុងឆ្នាំ ២០១១ លោកស្រីត្រូវបានតែងតាំងជានាយកប្រតិបត្តិដំបូងគេបង្អស់ របស់អង្គការសហប្រជាជាតិសម្រាប់ស្រ្តី (UN-Women) ដែលជាអង្គការមួយដែលផ្តោតសំខាន់លើការតស៊ូទាមទារដើម្បីសិទ្ធិស្ត្រី និងសិទ្ធិកុមារីជាលក្ខណៈអន្តរជាតិ។ ការផ្តល់សិទ្ធិអំណាចខាងសេដ្ឋកិច្ច និងការបញ្ចប់អំពើហឹង្សាលើស្ត្រីភេទ គឺជាអាទិភាពពីរក្នុងចំណោមអាទិភាពផ្សេងទៀតរបស់លោកស្រី នៅក្នុងអំឡុងពេលដែលលោកស្រីកាន់តំណែង។
បន្ទាប់ពីបានបញ្ចប់អាណត្តិទីពីររបស់លោកស្រីនៅខែមីនា ឆ្នាំ២០១៨ លោកស្រីត្រូវបានតែងតាំងជាប្រធានអង្គការភាពជាដៃគូសម្រាប់សុខភាពមាតា ទារក និងកុមារ ដែលជាសម្ព័ន្ធភាពនៃអង្គការជាង ១០០០ អង្គការ ក្នុងប្រទេសចំនួន ១៩២ ដែលមកពីសហគមន៍ សុខភាពផ្លូវភេទ សុខភាពបន្តពូជ សុខភាពមាតា ទារក កុមារ និងសុខភាពជនវ័យជំទង់។ ក្នុងនាមជាសហប្រធាននៃ
ក្រុមការងារជាន់ខ្ពស់សម្រាប់ស្ត្រីគ្រប់រូប កុមារគ្រប់រូប លោកស្រី បាស្យេឡេត បានបើកជាផ្លូវការនូវវេទិកា
ស្ត្រីគ្រប់រូប កុមារគ្រប់រូប នៅអាមេរិកឡាទីន និងការីប៊ីន (EWEC) ដែលជាវេទិកាលើកដំបូងបង្អស់សម្រាប់ការអនុវត្តថ្នាក់តំបន់នៃយុទ្ធសាស្ត្រសកលនៃ EWEC។
មីសែ្យល បាស្យេឡេត មានសញ្ញាប័ត្រវេជ្ជសាស្ត្រផ្នែកវះកាត់ ដែលមានឯកទេសខាងជំងឺកុមារ និងសុខភាពសាធារណៈ។ លោកស្រីក៏បានសិក្សាពីយុទ្ធសាស្ត្រយោធានៅបណ្ឌិតសភាជាតិផ្នែកយុទ្ធសាស្ត្រ និងគោលនយោបាយនៃប្រទេសស៊ីលី និងនៅមហាវិទ្យាល័យការពារជាតិអន្តរអាមេរិក នៅសហរដ្ឋអាមេរិក។
សូមទាញយក
រូបថតដែលមានគុណភាពល្អ។
----------------------------------------
ឧត្តមស្នងការកន្លងមកមាន៖
លោក ហ្សេដ រ៉ាអាដ អាល ហូសសេន (២០១៤-២០១៨)
លោកស្រី ណាវ៉ាណែតធឹ ភីទ្បៃ (២០០៨-២០១៤)
លោកស្រី លូហ្សេ អាបួរ (២០០៤-២០០៨)
លោក សឺជីអូរ វេរ៉ា ឌឺ មេទ្បូ (២០០២-២០០៣)
លោកស្រី ម៉ារី រ៉ូប៊ីនសុន (១៩៩៧-២០០២) និង
លោក ជូសេ អាយ៉ាទ្បា ទ្បាស់សូ (១៩៩៤-១៩៩៧)
លោក ប៊ីត្រាន់ ជី រាំចារ៉ាន់ ឧត្តមស្នងការរង (២០០៣-២០០៤)។
