|
ស្ថានភាពជំនួយផ្នែកច្បាប់ ក្នុងប្រទេសកម្ពុជា ត្រូវធ្វើការកែលំអជាចាំបាច់។ បច្ចុប្បន្ននេះ ជំនួយផ្នែកច្បាប់ ត្រូវបានផ្តល់ជាចម្បងដោយអង្គការក្រៅរដ្ឋាភិបាល ដែលផ្តល់មូលនិធិដោយម្ចាស់ជំនួយអន្តរជាតិ។ នាយកដ្ឋានជំនួយផ្នែកច្បាប់ (LAD) របស់គណៈមេធាវីនៃព្រះរាជាណាចក្រកម្ពុជា (BAKC) ក៏បំពេញការងារផ្តល់ជំនួយផ្នែកច្បាប់ដល់អ្នកក្រីក្រផងដែរ។ ទោះបីជាមានការកើនឡើងគួរឲ្យកត់សម្គាល់ រយៈពេលប៉ុន្មានឆ្នាំចុងក្រោយនេះ ក៏ដោយ ក៏ថវិកាដែលរដ្ឋាភិបាលផ្តល់ដល់គណៈមេធាវីនៃព្រះរាជាណាចក្រកម្ពុជា សម្រាប់គោលបំណងនេះ មិនគ្រប់គ្រាន់សម្រាប់បំពេញតម្រូវការរបស់អ្នកក្រីក្រទេ។ ចំនួនមេធាវីជំនួយផ្នែកច្បាប់ តិច និងថយចុះ ក៏ជាបញ្ហាប្រឈមដ៏សំខាន់ផងដែរ មានន័យថា ខេត្តជាច្រើនក្នុងប្រទេសកម្ពុជា ពុំមានមេធាវីជំនួយផ្នែកច្បាប់នោះទេ។
ក្រុមការងារបច្ចេកទេសស្តីពីកំណែទម្រង់ច្បាប់ និងប្រព័ន្ធតុលាការ ដែលធ្វើជាសហប្រធានដោយក្រសួងយុត្តិធម៌ និង ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានបញ្ចូលការអភិវឌ្ឍគោលនយោបាយជំនួយ ផ្នែកច្បាប់ និងការតស៊ូមតិ ដើម្បីបង្កើនថវិកាជំនួយផ្នែកច្បាប់ ទៅក្នុងសូចនាករតាមដានរួមរបស់ខ្លួន ដែលបានអនុម័ត ក្នុងឆ្នាំ ២០១៧។ ក្នុងឆ្នាំ ២០១៨ ក្រសួងយុត្តិធម៌បានចាប់ផ្តើមដំណើរការពិគ្រោះយោបល់មួយដើម្បីរៀបចំសេចក្តីព្រាងគោលនយោបាយជំនួយផ្នែកច្បាប់។
នៅកម្រិតសកល នៅថ្ងៃទី២០ ខែធ្នូ ឆ្នាំ២០១២ មហាសន្និបាតអង្គការសហប្រជាជាតិ បានអនុម័តនូវគោលការណ៍និងគោលការណ៍ ណែនាំរបស់អង្គការសហប្រជាជាតិស្តីពីសិទ្ធិទទួលបានជំនួយផ្នែកច្បាប់ នៅក្នុងប្រព័ន្ធយុត្តិធម៌ព្រហ្មទណ្ឌ ដើម្បីសង្កត់ធ្ងន់ពី ភារកិច្ច និងទំនួលខុសត្រូវចម្បងរបស់រដ្ឋក្នុងការផ្តល់ជំនួយផ្នែកច្បាប់ និងលៃលករកធនធានមនុស្ស និងហិរញ្ញវត្ថុចាំបាច់សម្រាប់ប្រព័ន្ធជំនួយផ្នែកច្បាប់។ ជាពិសេស គោលការណ៍ និងគោលការណ៍ណែនាំនេះ មានចែងពីការណែនាំដ៏មានប្រយោជន៍ និងសម្រាប់ អនុវត្តជាក់ស្តែងចំពោះរដ្ឋ ក្នុងការបង្កើតនូវប្រព័ន្ធជំនួយផ្នែកច្បាប់ជាតិដ៏មានប្រសិទ្ធភាព និងមាននិរន្តរភាព។ សម្រាប់អត្ថបទទាក់ទងនឹងគោលការណ៍ និងគោលការណ៍ណែនាំរបស់អង្គការសហប្រជាជាតិស្តីពីសិទ្ធិទទួលបានជំនួយផ្នែកច្បាប់ នៅក្នុងប្រព័ន្ធ យុត្តិធម៌ព្រហ្មទណ្ឌ។ សូមចុចទីនេះ មានភាសា អង់គ្លេស និង ខ្មែរ។
|
