តើរបាយការណ៍សន្ធិសញ្ញាគឺជាអ្វី?
កម្ពុជាបានក្លាយជាភាគីនៃសន្ធិសញ្ញាសិទ្ធិមនុស្សអន្តរជាតិសំខាន់ៗ និងពិធីសារបន្ថែមលើសន្ធិសញ្ញា ដូចខាងក្រោមនេះ៖
 
កតិកាសញ្ញាអន្តរជាតិ ស្តីពីសិទ្ធិសេដ្ឋកិច្ច សង្គមកិច្ច និងវប្បធម៌ (ICESCR)
កតិកាសញ្ញាអន្តរជាតិ ស្តីពីសិទិ្ធពលរដ្ឋ និងសិទិ្ធនយោបាយ (ICCPR)
អនុសញ្ញាអន្តរជាតិ ស្តីពីការបំបាត់រាល់ទម្រង់នៃការរើសអើងពូជសាសន៍ (ICERD)
អនុសញ្ញាស្តីពីការបំបាត់ការរើសអើងប្រឆាំងនឹងស្ត្រី (CEDAW) និងពិធីសារបន្ថែមលើអនុសញ្ញានេះ
អនុសញ្ញាប្រឆាំងការធ្វើទារុណកម្ម និងការប្រព្រឹត្តមកលើខ្លួន ឬទណ្ឌកម្មឯទៀត ដែលឃោឃៅអមនុស្សធម៌ ឬ បន្ថោកបន្ទាប (CAT) និងពិធីសារបន្ថែមលើអនុសញ្ញាអនេះ
អនុសញ្ញាស្តីពីសិទ្ធិកុមារ (CRC) ពិធីសារបន្ថែមលើអនុសញ្ញានេះ ស្តីពីការលក់កុមារ ពេស្យាកម្មកុមារ និងកាមសាស្រ្តកុមារ និងពិធីសារបន្ថែមលើអនុសញ្ញានេះ ស្តីពីការពាក់ព័ន្ឋនៅក្នុងជំលោះប្រដាប់អាវុធ
អនុសញ្ញាស្តីពីសិទ្ធិជនពិការ
អនុសញ្ញាស្តីពីការការពារមនុស្សគ្រប់រូបពីការបាត់ខ្លួនដោយបង្ខំ។
 
តាមរយៈការទទួលយកសន្ធិសញ្ញាទាំងនេះ រដ្ឋាភិបាលបានសន្យាភ្ជាប់កាតព្វកិច្ចតាមផ្លូវច្បាប់ក្នុងការអនុវត្តសិទ្ធិទាំងឡាយដែលមានចែងក្នុងសន្ធិសញ្ញា ដើម្បីជាប្រយោជន៍ដល់មនុស្សគ្រប់រូបនៅប្រទេសកម្ពុជា។
 
រដ្ឋភាគីទាំងឡាយនៃសន្ធិសញ្ញាសិទ្ធិមនុស្ស ត្រូវដាក់បញ្ជូនរបាយការណ៍ជាទៀងទាត់ ទៅអង្គការសហប្រជាជាតិ ស្តីពីរបៀបអនុវត្តសិទ្ធិក្នុងសន្ធិសញ្ញានេះ។ របាយការណ៍ទាំងនេះ ត្រូវបានពិនិត្យឡើងវិញដោយគណៈកម្មាធិការជំនាញឯករាជ្យ ដែលជារឿយៗ គេហៅថាជា“ ស្ថាប័នសន្ធិសញ្ញា” ។ គណៈកម្មាធិការនេះពិនិត្យរបាយការណ៍នីមួយៗ និងដោះស្រាយកង្វល់ដែលមានក្នុងរបាយការណ៍ ហើយដាក់ចេញជាអនុសាសន៍ផ្សេងៗជូនទៅរដ្ឋភាគី ក្នុងរូបភាពជា “សេចក្តីសន្និដ្ឋានចុងក្រោយ”។ គោលបំណងនៃដំណើរការនេះ មិនមែនដើម្បីរិះគន់រដ្ឋាភិបាលនោះទេ ប៉ុន្តែដើម្បីផ្តល់ប្រឹក្សាយោបល់ក្នុងន័យស្ថាបនាពីមធ្យោបាយដែលប្រទេសនានា អាចធ្វើឱ្យមានវឌ្ឍនភាពកាន់តែប្រសើរឡើង ឆ្ពោះទៅរកការធានាថាមនុស្សគ្រប់រូបអាចប្រើប្រាស់សិទ្ធិទាំងឡាយដែលមានចែងក្នុងសន្ធិសញ្ញានេះ។ ស្ថាប័នសន្ធិសញ្ញានេះមិនពឹងផ្អែកទាំងស្រុងលើព័ត៌មានដែលបានផ្តល់នៅក្នុងរបាយការណ៍របស់រដ្ឋាភិបាល ដើម្បីធ្វើការវាយតម្លៃនោះទេ។ គណៈកម្មាធិការបើកចំហផងដែរ ចំពោះការដាក់ស្នើពីអង្គការក្រៅរដ្ឋាភិបាលជាតិ និងអន្តរជាតិ ក៏ដូចជាទីភ្នាក់ងារអង្គការសហប្រជាជាតិ ដូចជា អង្គការសុខភាពពិភពលោក (WHO) ឬអង្គការពលកម្មអន្តរជាតិ (ILO)។
 
សម្រាប់ព័ត៌មានបន្ថែមស្តីពីការធ្វើរាយការណ៍របស់កម្ពុជា ក្រោមសន្ធិសញ្ញានីមួយៗ សូមជ្រើសរើសសន្ធិសញ្ញាពាក់ព័ន្ធ នៅក្នុងបញ្ជីឈ្មោះសន្ធិសញ្ញាខាងក្រោម ដែលលោកអ្នកនឹងឃើញរបាយការណ៍ដែលបានដាក់បញ្ជូនដោយរាជរដ្ឋាភិបាលនៃព្រះរាជាណាចក្រកម្ពុជា ក៏ដូចជា បញ្ជីបញ្ហា និងសំណួរសេចក្តីសន្និដ្ឋានចុងក្រោយ និងអនុសាសន៍ផ្សេងៗធ្វើឡើងដោយស្ថាប័នសន្ធិសញ្ញានានា។